Bsuech bim Udewändu

Hüt hani wöue ga ichoufe. Ha de via FB met em Frenzi abgmacht i löi ihre la lüte wüu si wohnt grad dert. I has de versuecht, ha aber weder met em ch Telifon no met em spanische chönne ihre alüte. Dört wo si wohnt si öbbe 200 Wohnige u i ha natürli wider nümm gwüsst weles Nummero. I has de uf guet glück versuecht u bi dert ga lüte woni dänkt ha ( hie si ebe d Wohnige nid agschribe met Name nur Nummero)
Ha de glütet. De chunt doch tatsächlich öber cho d Wohnig uf due, aber nid s Frenzi :-) e totau verpennete Udewande :-)

D Zeiche stöh uf Sturm

Gester hei mer plötzlich 2/3 vom Resti müesse zuedue wüu dr Sturm chunt. dä chöm schiins 2 mau im Jahr. I ha de dänkgt, guet es Gwitterli. Das wär aues no gange. Bi de nach em Schaffe hei. Ir Nacht hets plötzlich gang wie dümmer afa due. u i bi öbis ga trinke u ha de gseh das es mitts dur d Wohnig louft das cheibe Wasser. Ha de chli afa tröchne, es isch aber zimli ussichtslos gsi u wo i gseh ha das es eifach hinge wider uselouft bini de wider is Bett. jetz hei mer wider s schönste Wätter u 25°.

Mis Date

Gester hani ja met däm vom Bus abgmacht. Mir hei üs im Bus troffe. D Modis wo mit mir wohne hei mi de zum Bus begleitet zum dä Herr mou z luege. isch weni piinlech gsi. Mir hei de im Bus e chli gschnöret u si de is Roger`s. ( Mia e Gruess ) Die hei sich wie immer gfreut u s Frenzi u dr Enrique hei scho uf üs gwartet, ou dr Mousse ( dä het ame met em Enrique ar Lulubar gschaffet) Mir hei de eis trunke. Ha de müesse tanze obwou i gseit ha i chönn nid. u i muess säge isch cool gsi. är hets würkli guet chönne u so isch es für mi eifacher gsi. Irgendeinisch het är mi de schüch mau küsst. Hallo är isch grad mau 20gi. Aber n o härzig. D Föteli si im FB. Mir si die ganz Nacht im Roger`s gsi u hei tanzet. Äm haubi 5 si de die angere hei. I ha natürli wider nid hei chönne. Mir hei de no chli dänzlet u si de no chli a Strand...
Hüt we är fertig isch met schaffe chunt är mit üs eis cho zieh. D Michelle het ebe o no grad es date met emene Canario :-) breicht sech ja guet.

Interessanti Busfahrt

Gester Abe bini met em Bus uf Playa wüu i met em Frenzi abgmacht ha zum eis ga zieh. Ha ebe jetz usegfunge, dass d Büs o ir Nacht fahre we me richtig luegt :-) De bruchi nur ei Wäg s Taxi. I bi de Im Bus ghocket u ha grad ufs Handy gluegt. Wüu das dumme Ding immer absteut hani erst jetz gseh dass mir s Fränzi gschribe het, ihre göis nid guet. Hmm na ja, dumm gloffe. I ha dänkt i göi de trotzdäm eis ga trinke wüu i im Santy no gschribe ha i sig de im Rogers. Dä isch natürli nid cho.
Wo i bi igstige isch e Typ im Bus gsi woni scho einisch gseh ha. I bi de schräg hinger ihm abghocket. Är het mi de gfragt ob i Norwegin sig. I ha wider mau schnippisch gantwortet nei. De het är mi immer agluegt, u de plötzlich hocht är vüre. Irgendweinisch isch är de vor mi cho hocke u het mi gfragt vo wo i de sig u wie i heissi, är sig dr Gabriel. Mir hei de chli plöiderlet. Uf spanisch versteit sich. Är cha nur spanisch u norwegisch wüu är 2 Jahr z Norwege isch gsi. Öb är de mini Nummere dörfi ha. Ja eh :-)
Hüt het är mir scho 5 Mau aglüte u gfragt ob mir üs hinech chönne gseh. I ga eh uf Playa wüu s Frenzi u i für hüt hei abgmacht.

Gester bini z Playa gsi um nöime mis Dossie abzgä.Diräkt am Strand imene guete Hotel. Jetz hoffi i chöm gli bscheid über.
De hani dr Kolleg troffe. Bi de zu Ihm eis ga trinke. är wohnt met momentan 3 ne zäme. ha dänkt es cha nid schade, vilich wüsse die e wohnig oder e job. Isch de ei huere komedi worde. Si hei de wider kochet für mi. u plötzlich nimmt eine s keyboard füre u fot a musige. de hets wider e teekomedi gä so richtig.
Tee chöchu uf em Gasbrönnet. Hundert mau vom einte is angere glas füue... rächt lustig. dr eint het mer de no vorgfüehrt wie me am beste cha glette. Met fäisterputzspray zum befüechte. es wär ihm nanai i sinn cho met wasser :-)